Nýtt þvottahús blogg #15

Eins og ég var búin að sýna ykkur þá vorum við búin að setja nýja eldhúsinnréttingu og vorum byrjuð á þvottahúsinu.. Nú er það klárt :=)

Við smíðuðum nýja innréttingu inn í þvottahúsið úr gömlu eldhúsinnréttingunni okkar.

 Þannig varð þessi gamla og illa farna eldhús innrétting að............

 Þessarri "glænýju" þvottahúsinnréttingu !!

Þar sem að gólfið var bara málað og þvottavélin og þurrkarinn voru á gólfinu áður þá er þetta mikill munur ! :) Við flísalögðum sjálf og púsluðum þessarri líka fínu innrétingu saman sem ég bjóst við að yrði algjört klúður en þetta er bara nokkuð flott að mér finnst.. Þvottagrindurnar passa líka akkúrat undir.. Svo kemur vaskurinn þarna vinstra megin.. Svona þegar maðurinn minn er í stuði til þess að saga út fyrir honum og tengja <3...

Ég átti líka þessa fínu hillu úti í skúr hjá teingdó en ég var víst búin að mála hana hvíta á sínum tíma svo ég pússaði rétt yfir hana og gaf henni svona "old style look" Hún kemur mjög vel út.. En hugmyndin er að kaupa litlar svartar körfur og setja inn í hólfin og geyma smáhluti eins og vettlinga og sokka þar ofan í.

Ég bjó til þessa krítartöflu með því að pússa, grunna og mála þrjár umferðir með krítarmállingu. Svo rammaði ég hana inn með listum sem ég átti til og hafði spreyjað áður. Ég spreyjaði svo aðeins yfir og listana aftur þegar ég var búin að festa þá á og lét spreyjið viljandi fara út á krítartöfluna til skyggingar. Fiðrildin keypti ég á ali express á lítinn pening. Snagarnir voru líka til en þeir fengu líka sprey-meðferð.

Eggjabakki fær nýtt líf blogg #17

Sæl öll.. mér finnst voðalega gaman að gefa hlutunum nýtt líf.. Ég sá snilldar hugmynd á pinterest þess efnis að nota eggjabakka til skreytingar á inniseríu...

Ferlið var einhvernvegin svona..

Ég safnaði fullt af eggjabökkum..

Svo klippti ég "hólana" út úr eggjabakkanum..

Þar til þeir urðu einhvernvegin svona..

Sjái þið gatið efst á hólnum?... þar klippti ég smá rauf svona u.þ.b. hálfan cm.

 Síðan var spreyjað og spreyjað og látið þorna..

Svo var öllum ljósunum komið fyrir inn í hólinn það er auðvelt að koma ljósinu inn þegar búið er að klippa smá rauf svo má auðveldlega loka henni aftur.. Þá er þetta orðið nokkhvurnvegin svona :)

Hún kemur svo vel út <3

Auðvitað var serían sett á besta staðinn á heimilinu <3

Það kemur svo þægileg birta af henni.. Svo rómó og fallegt <3

Þar til næst - J

Kökupinnar blogg #16

Ég fékk ansi hreint skemmtilegt verkefni í skólanum í upplýsingatækni, en ég átti semsagt að búa til myndasögu um það sem ég vildi en það var æskilegt að það væri hægt að nota það til kennslu. Þá voru góð ráð dýr.. Í fyrstu datt mér ekkert í hug en svo hugsaði ég til þess hvað ég var ótrúlega lengi að ná því að gera almennilega kökupinna, svo afhverju ekki að nota það? Ég notaði forrit sem heitir Comic Life og skilaði verkefninu á PDF formatti.. en til þess að geta sett þetta hér inn á bloggið varð ég að taka myndir af PDF skjalinu þannig að gæðin eru kanski ekki mjög góð en engu að síðu skemmtilegt ! .. Hvernig væri nú að gera matreiðslubók með svona myndasögu þema?.. 

 

Strigamyndir DIY blogg #15

Mig langaði svo í fallegar myndir í nýja eldhúsið mitt. En þar sem að ég var ekki alveg að tíma mörgum þúsundköllum í strigamyndir út í búð að þá voru góð ráð dýr..

Ég fann þessar líka fallegu strigamyndir á aliexpress á litla 19 dollara.
Þær komu til mín upprúllaðar og í góðum umbúðum. Ég skoðaði myndirnar vel, fór svo út í búð og keypti ramma hjá framköllunarþjónustunni sem lítur einhvernvegin svona út þegar búið er að setja hann saman. En það eru litlar raufir í hornunum svo spíturnar smellast mjög auðveldlega saman, það þarf ekki að líma neitt bara smella og wola..

Næst var að máta myndina á rammann og sjá svona hvernig ég vildi hafa þetta allt saman.

Síðan strekkti ég myndina yfir rammann og heftaði með heftibyssu fyrir aftan..

Það er hægt að fá fullt af upplýsingum um það hvernig á að strekkja strigamynd á ramma t.d. https://www.youtube.com/watch?v=QkToBRa-O-U

En lokaútkoman er sumsé einhvernvegin svona. Ég er mjög ánægð með útkomuna, eldhúsið fær einhvernvegin meiri svip og verður hlýlegra þegar það eru komnar upp fallegar myndir.

Ekki skemmir það fyrir hvað þær voru ódýrar líka 3 strigamyndir 40*40 á innan við 5000 kall. !

Súkkulaðimús blogg#15

Súkkulaðimús ala Jóhanna

 Hvað er betra en súkkulaðisprengja og ber? mmm.. þetta er það besta sem að ég fæ og þetta er svo einfalt !
Súkkulaðimús hljómar eins eftirréttur sem maður fær bara á 5 stjörnu veitingastað en þetta þarf ekki að vera flókið !

Ég bræddi saman 1 plötu af suðusúkkulaði og sirka 1 deselíter af rjóma.. svo þegar allt var bráðnað bætti ég við 4 kókosbollum og hrært vel í svo er gumsið látið kólna inni í ísskáp í svolítinn tíma. Svo er bara að setja þau ber sem að manni finnst góð neðst í skálina ég notaði vínber og jarðaber og svo hella súkkulaðigumsinu yfir og skreyta. Ég skar niður prins póló og setti út í.

Þessi skammtur myndi eflaust duga fyrir 6 manns ef notaðar væru minni skálar. En þar sem að við erum bæði mjög mikið fyrir súkkulaði og þegar græðgin er mikil þá borðuðum við þetta nú bara tvö yfir góðri bíómynd.

Nýtt eldhús blogg #14

Þegar við keyptum húsið okkar þá vorum við sammála því að við þyrftum að gera róttækar breytingar é eldhúsinu okkar það leit nokkhvurnvegin svona út áður en við hófumst handa.

Þessi innrétting er upprunaleg og hafði verið í húsinu síðan það var byggt árið 1975. Allar lamirnar voru ónýtar og hurðarnar lágu einhvernvegin samanpúslaðar á hjörunum. Við byrjuðum á því að taka allar hurðarnar af og röðuðum allra nauðsynlegasta dótinu okkar í eldhúsið hitt fékk að dúsa ofan í kassa. Síðan fórum við í verðkönnun, við komumst að því að besta verðið sem við fengum í nýja innréttingu var hjá parki.is þeir buðu okkur fallega innréttingu og átti biðtíminn að vera 5 vikur.
Eftir 6 vikur bólaði ekkert á innréttingunni okkar og hún hafði ekki einu sinni farið í pönntun, því þeir þurfa að fylla heilann gám til þess að pannta og það var ekki næg eftirpsurn hjá þeim. En þar sem að við höfðum beðið svo lengi fengum við að koma og velja hvaða innréttingu sem er og greiða fyrir hana sama verð og um var talað áður.
           Við slógum til. En biðin hófst aftur, það klúðraðist eitthvað hjá framleiðslunni og pirringurinn var vægast sagt mikill! En allt kom fyrir ekkert innréttinginn kom eftir 6.5 mánaða bið!
Við rifum út gamla eldhúsið, það var lítið mál því það var ónýtt og allt farið að ryðga niður.

Ekki nóg með að það hafi verið viðbjóðis dúkur á gólfinu heldur var korkur líka á gólfinu sem varð að fara.. já og á veggnum þar sem svarta skilið er þar var dúkur og límið undan því var helvíti erfitt að skrapa af..
Næst var öllu sópað út og síðan var allt málað.
Við kunnum ekki að flísaleggja svo við fengum Gunna múrara til þess að flísaleggja en gólfflísarnar höfðum við keypt á sama tíma og innréttinguna hjá parki.is. Hann kenndi okkur að flísaleggja svo við gætum gert það sjálf inni í þvottahúsi.
Hann var ekki lengi að þessu maðurinn svo kom innréttingin og þá var hafist handa við að setja hana upp því að allir skáparnir komu samansettir svo við héldum að þetta væri nú lítið mál.

En nei þá voru engar leiðbeiningar með og ekki ein skrúfa eða vinkill til þess að festa allt saman.. innréttingin er ekki á löppum og þurftum við því að smíða sökkulinn frá grunni.
Við gáfumst upp á þessu og fengum til okkar smið sem græjjaði þetta fyrir okkur á 3 dögum.
Við keyptum span-helluborð og ofn umbúðarlaust í Elko á rétt rúmar 100 þúsund krónur =)

Svo fórum við í Múrbúðina þar keyptum við blöndunartæki og vask á fínu verði.

Það er þvílikur munur að vera komin með almennileg blöndunartækið á heimilið. Það munar öllu að vera með svona sprautu t.d. þegar maður er að þrífa ofnplöturnar og grindurnar.
Jæja sagan heldur áfram þá var innréttingin komin upp en þá var að flísaleggja sökkulinn og vegginn fyrir ofan helluborðið og út í gluggakistu, það var prógram útaf fyrir sig að velja réttu flísarnar á vegginn. Við fengum Gunna múrara aftur til þess að græjja þetta fyrir okkur því við vildum hafa eldhúsið alveg "spottless"

Þá var loksins hægt að fara að dúllast eitthvað í eldhúsinu. Frúnni vannst þó eitthvað skrítið því eldhúsborðið sem við áttum var lítið og svart og var engan vegin að passa inn í lúkkið á eldhúsinu. Svo ég keypti notað gler-eldhúsborð og fór svo í Ikea og keypti eldhússtóla.
ahh þá var hægt að anda léttar og allt tilbúið lokisins <3

Klukkuna fékk ég í Rúmfatalagernum, körfuna með bönununum keypt ég á Spáni fyrir löngu síðan. Plattinn sem er á eldhúsborðinu er frá LisbethDahl og kertin og spjótin sem eru á bakkanum eur úr Rúmfó.
Ég er gjörsamlega í skýjunum með eldhúsið mitt. Næsta verkefni er þegar hafið og er það þvottahúsið, en við ætlum að nota gömlu ljótu innréttinguna sem var í elhdúsinu í það verkefni. Við eurm búin að flísaleggja í þvottahúsinu og búrinu alveg sjálf. Gunni meistari kenndi okkur að flísaleggja og vitiði að það er bara mjög lítið mál !

Núna eurm við að byrja að setja innréttinguna upp. En í þvottahúsinu verður vaskur,  og svo borðplata í borðhæð þar sem að þvottavélin og þurrkarinn verða uppá. Svo verður óhreinatauið geymt fyrir neðan.

-Þar til næst ást&friður - Jóhanna <3

Krukkuæði blogg#13

Það hafa sennilega flestir tekið eftir því að krukkur eru mjög vinsælar núna. Það mætti eiginlega segja að það væri krukkuæði !

Það er fínt að geta endurnýtt krukkur, ég hef m.a. notað þær aftur undir sultu, baðsalt, skrúbba og fleira sem ég hef búið til sjálf. En nýjasta föndrið úr krukkum hjá mér eru kertastjakar. Ég ákvað fyrir einhverja tilviljun að prufa að þæfa utan um krukkur og viti menn það kom svona líka gasalega vel út.

Birtan sem kemur frá þeim er svo þæginleg og það er lítið mál að taka ullina af og skella nýrri á. T.d. ef maður vill breyta um liti.

Ég keypti um daginn nokkur mismunandi kerti í krukkum, raðaði þeim svo á bakka sem að ég keypti frá Lisbeth Dahl. Hér er útkoman. 

Mér finnst þetta svo smart að ég tími ekki að kveikja á kertunum...

Margir hafa skreytt krukkur og notað sem kertastjaka og skreytingar í allskonar veislum. M.a. í brúðkaupsveislum, fermingum o.s.f.v.. Mér finnst alltaf svo gaman að sjá heimatilbúnar skreytingar t.d. eins og þessar.

Hér eru efnisbútar límdir á krukkur og borði svo settur efst á krukkuna. Það er endalaust hægt að leika sér með mismunandi efni, böndum og skrauti.

Mér hefur aldrei nottið þetta í hug en það er meira að segja hægt að setja eftirrétti í krukkur.

Mér finnst svo gaman að skoða hvernig fólk endurvinnur og notar krukkurnar sínar.
Í stað þess að hafa alla þessa hluti allt út um allt er búið að raða þeim snyrtilega í glærar krukkur svo það er hægt að sjá nákvæmlega hvað er í krukkunni fyrir utan það hvað þetta er ótrúlega smart !

Flestir eru með hveitið, sykurinn, kornflexið o.s.fv.. í sínum upphaflegu umbúðum og það jafnvel sullast aðeins úr umbúðunum með tímanum hver kannast ekki við það? Ég er þarf a.m.k. mjög reglulega að þurrka skúffuna þar sem að ég er með bökunardótið mitt.. hvernig væri þá að skella þessu bara í krukkur ? Snyrtilegt, fallegt og þæginlegt.

Takk fyrir að fylgjast með ;*^

Skartgripahirsla blogg#12

Það eru margar skvísur í vandræðum þegar kemur að því að geyma skartgripina sína. Þeir eiga það til að liggja hér og þar um allt hús.. Ég kannast svo sannarlega við þetta vandamál. En oftast þá er ég bara löt að ganga frá þeim þangað þar sem að þeir eiga heima.

Ég var hinsvegar í mestu vandræðum þegar kom að stóru hálsmenunum mínum, mér datt engan vegin í hug hvar ég ætti að geyma þá.. Fyrr en ég rakst á eina dömu á pinterest sem nelgdi nagla í vegginn hjá sér og hengdi stóru hálsmenin sín þar upp. Ég pældi mikið í því hvar ég gæti nelgt en mundi svo allt í einu eftir snögunum mínum sem voru akkúrat á henntugum stað.
Tjahh og mér fannst alltaf svo hallærislegt að hafa snaga við hliðina á fataskápnum mínum fyrir aftan snyrtiborðið mitt sem ég notaði aldrei og ég var að spá í því að taka þá niður.. Sem betur fer tók ég þá ekki niður og fann þeim í stað nýjan tilgang.

Þó ég segi sjálf frá þá finnst mér þetta bara koma nokkuð vel út ! :=)

Fínu skartgripirnir mínir (þessir ekta) Eru ofan í skartgripaboxinu mínu eða ennþá í boxinu sem þeir komu í. Eyrnalokkar, minni hálsmeni og armbönd hanga á skartgripahenginu, hringarnir eru svo á hringastandinum (svörtu hendinni) og ofan í hvíta skartgripaboxinu..

Skartgripahirslan mín lítur þá svona út í allri sinni dýrð..

Ég var upphaflega með snyrtidótið mitt á snyrtiborðinu, en þegar ég fór að búa þá færði ég það allt inn á bað. Ég ætlaði svo að selja snyrtiborðið þegar ég og maðurinn minn keyptum húsið okkar því ég fann engann stað fyrir það. En þar sem að það smellpassaði í þetta litla skot þá ákvað ég að halda í það og raða skartgripunum mínum á það =)

örbylgjukaka blogg#11

Stundum langar manni í nýbakaða köku og nennir samt eiginlega ekki að fara að standa í því að baka .. Þá er fínt að geta hennt í eina passlega stóra köku (henntar fyrir 2-3)

Uppskrift

4 msk hveiti
4. msk sykur
1 msk kakó
2 egg
3 msk mjólk
3 msk bráðið smjör
3 msk súkkulaðispænir
1 tsk vanilludropar


Ok blandið öllu nema súkkulaði spænunum vel saman, setjið súkkulaðispænirnar út í alveg í restina og blandið varlega saman við.

Skellið þessu í eitthvað mót sem þolir örbylgju, ég mæli með því að smyrja það aðeins með smjöry fyrst eða nota panam sprey..
Svo bara skelliði þessu í örbylgjuna á hæsta hita.. tekur um 3-5 mín fer eftir því hversu hátt örbylgjuofninn fer.. minn er 700w og þurfti kakan um 5 mín.. Fínt að byrja á 3 mín og stinga prjóni í miðjuna og fylgjast vel með..

Hvað er svo betra með glænýrri köku heldur en ískaldur ís.. mmmmmmmm..

Húsráð blogg#10

Ég rakst á þessi skemmtilegu ráð á pinterest og langar að deila þeim með ykkur. Pinterest er uppáhalds síðan mín þessa dagana. Margt af þessu hefur komið sér vel..

Handavinna, blogg#9

Ég hef ofboðslega gaman af handavinnu þá sérstaklega að prjóna.
Það var hún föðuramma mín og móður afiminn sem að kenndu mér að prjóna. Ég hef verið 4 ára gömul þegar amma kenndi mér svokallað hundafit. Svo fljótlega fór ég að prjóna mottur fyrir barbídúkkurnar mínar og trefla í öllum stærðum og gerðum. Svo komu húfurnar hverjar á fætur annarri og svona þróaðist þetta.
Í dag fæ ég svokölluð prjónaköst, mér dettur kanski í hug að prjóna eina peysu og ég klára hana á nokkrum dögum svo líða kanski einhverjar vikur þar til ég prjóna næst..
Það síðasta sem ég prjónaði var peysa á sjálfa mig. Hún heitir ,,Prýði" og hana er að finna í bókinni ,,Prjónað úr íslenskri ull"

Mig vanntaði nefninlega einhverja svona fínni peysu á mig sjálfa fyrir sveitabrúðkaup sem að við erum að fara í seinna í mánuðinum svo ég skellti mér bara í það að prjóna peysu á mig og ég er mjög sátt við útkomuna. Ég held að þessi verði mikið notuð.


Ég hef gaman að því að vinna með lopa, ég hef svolítið verið að þæfa, þá aðalega blóm sem ég bý svo til seríur úr. Ein jólin fengu allir blómaseríu í jólagjöf og það vakti sko mikla lukku, enda er alltaf gaman að fá fallegar heimatilbúnar gjafir að gjöf.

Uppskriftin af þeim er einföld, maður einfaldlega þæfir í kringum golfkúlur, setur svo kúlurnar í nælon sokk, bindur fyrir og hendir í þvottavélina. Það er mjög gott og gáfulegt að setja nokkur handklæði með þá heyrist ekki eins mikið hljóð.. Svo leyfir maður þessu að þorna í rólegheitunum og tekur svo úr sokkunum og klippir í X tekur golfkúluna úr og gerir svo gat hinu megin stingur ljósinu af seríunni í gegn og saumar svo í kring.

Það verður ekki lengra í bili :) Þar til næst lifið heil.

Persónuleg kerti, blogg#8

Það er alltaf gaman að gefa heimatilbúnar gjafir, og hvað er fallegra en fallegt kerti ? Maður á aldrei nóg af kertum og möguleikarnir eru endalausir.

Ég ætla að deila því með ykkur, hvernig ég bý til svona myndakerti.

Ég byrja auðvitað á því að finna mynd og prennta hana út á venjulegan A4 pappír og klippi hana út eins og ég vil hafa hana á kertinu.

Næst legg ég myndina ofan á kertið og stilli myndina eins og ég vil hafa hana.

Svo tek ég smjörpappír og legg yfir myndina.

Svo strauja ég létt yfir ATH! að strauja ekki of mikið !!

Svo tek ég smjörpappírinn, varlega af ! .. ef myndin hefur ekki farið inn í kertið almennilega þá má leggja smjörpappírinn yfir aftur og strauja. Það er auðveldast að nota hvít kerti. Því liturinn á það til að koma í gegn á lituðu kertunum. Því verður að passa það sérstaklega vel með lituð kerti að strauja alls ekki of mikið. En það er minni hætta á því að klúðra ef maður notar hvítt kerti.

 

 Svona líta þá kertin út þegar þetta er búið. Það er mjög gott að spreyja glæru lakki yfir þá er í lagi að kveikja á kertunum. En ef það er ekki gert þá myndi ég ekki kveikja á kertunum.. En hver tímir því að kveikja á svona kerti ?

Það er hægt að nota sömu aðferð með t.d. servíettum og lakka svo yfir það er líka mjög töff og eitthvað sem ég á klárlega eftir að prufa. Hver vill ekki eiga svona kerti ? .. Mjög persónuleg, falleg og öðruvísi. Takk fyrir mig <3

Ódýr myndarammi, blogg#7

Ég átti til svo mikið af gömlum geisladiskum sem ég er löngu hætt að hlusta á, og í staðinn fyrir að henda þeim í ruslið þá ákvað ég að föndra aðeins með þá. Ég hugsaði með mér hvað bakhliðin á geisladiskum væri í raun flottur bakgrunnur t.d. fyrir myndir, svo ég fór að prufa mig áfram...

Hér er mynd af útkomunni.

          Ég byrjaði á því að raða geisladiskunum eins og ég myndi vilja láta myndaramman vera, og límdi þá síðan saman með límbyssu. Síðan klippti ég til myndirnar sem ég var búin að velja og límdi þær á með uhu lími. Svo lýmdi ég lyklakippuhring efst á efstu diskana með límbyssunni svo það er hægt að hengja upp ramman líka nú eða láta hann standa á hillu eins og sést á myndinni hér fyrir ofan.
Ég gaf teingdó þenann myndaramma í jólagjöf og hún var rosalega ánægð

Mér finnst svo gaman að gefa persónulegar gjafir sem ég hef búið til sjálf og það er alltaf gaman þegar fólk hefur gaman að því líka.

Mig langar rosalega mikið að prufa að brjóta geisladiska og búa til mósaík listaverk, ég geri það kanski næst ! :)

Takk fyrir frábærar viðtökur !! :D

Fataskápur, fyrir/eftir, blogg#6

Mér leist ekkert á fataskápinn í nýja húsinu okkar, ég hugsaði mikið um það að kaupa nýjan en í staðin fyrir að rjúka út í búð og versla nýjan fataskáp þá ákvað ég að mála hann og voooola hann er orðin eins og nýr. Svona leit hann út fyrir breytingar, og áður en við fluttum inn í húsið.

Við tókum allar hurðirnar af og fórum með þær út í skúr, Ég málaði skápinn að innan (hann var eins á litinn og að utan.
Næst tók ég allar lamir og festingar af skápahurðunum, málaði svo allar skápahurðirnar 3 sinnum hvoru megin. Næst spreyjaði ég yfir þær með háglas hvítu spreyji og voola svona er útkoman.

Allt annað líf ekki satt? Hann nýtur sín mun betur núna. Hann er eins að innan og að utan og er nánast orðin eins og nýr. Ég spreyjaði húnana gull litaða og þar sem að við erum með gull litað þema inni í herberginu okkar þá passar þetta akkurat við allt.

Við notuðum afgangs málingu til þess að mála skápahurðirnar frá því að við máluðum alla íbúðina svo eini kostnaðurinn við þetta make-over voru spreyin 2 sem ég notaði til þess að spreyja hurðirnar og hurðahúnana.